دنیا کے خوبصورت اور پرکشش چہروں کی فہرست جاری کرنے والے برطانیہ کے خودمختار ادارے ’دی انڈیپینڈنٹ کرٹکس‘ اور ’ٹی سی کینڈلر‘ نے رواں برس کی نامزدگی فہرست جاری کردی ہے۔
مذکورہ ادارہ 1990 سے لے کر ہر سال دنیا کے خوبصورت اور پرکشش شخصیات کی فہرست جاری کرتا آرہا ہے اور رواں سال کی نامزدگی فہرست میں گزشتہ چند برسوں کی طرح اس بار بھی فواد خان اور عمران عباس جگہ بنانے میں کامیاب رہے۔
اس فہرست کی نامزدگیوں کا اعلان ہر سال کے آغاز سے ہی کیا جاتا ہے جبکہ کامیاب افراد کا اعلان سال کے آخر میں کیا جاتا ہے۔
دنیا کے خوبصورت اور پرکشش شخصیات کی فہرست کے لیے رواں سال نامزد پاکستانی اداکاراؤں میں عائزہ خان، سجل علی اور نیلم منیر شامل ہیں۔
ادارے کی جانب سے عائزہ خان کی تصویر اپنے آفیشل انسٹاگرام اکاؤنٹ پر شیئر کرتے ہوئے کیپشن میں کہا گیا کہ ’ان خوبصورت لوگوں کو 2022 کے 100 پرکشش چہروں کی فہرست میں باضابطہ طور پر نامزد ہونے پر مبارکباد‘۔
نامزدگی فہرست جاری ہونے کے بعد اب اگلے مرحلے میں ووٹنگ کا عمل ہوگا جو اس بات کا تعین کرے گا کہ نامزد افراد میں سے اصل فہرست میں کون جگہ بنانے میں کامیاب رہے گا۔
نامزد کی گئی دیگر شخصیات میں بھارت، ایران، ترکی، کوریا، جاپان، چین، امریکا، متحدہ عرب امارات، برطانیہ اور برازیل سمیت دیگر ممالک کی شوبز شخصیات شامل ہیں۔
پاکستانی اداکاروں سے متعلق یہ دلچسپ خبر سامنے آنے کے بعد ان کے مداح اپنے پسندیدہ ستاروں کو خوبصورت ترین چہروں کی عالمی فہرست کے لیے نامزد ہونے پر مبارکباد اور خوشی کا اظہار کررہے ہیں۔
واضح رہے کہ عائزہ خان اور سجل علی کو گزشتہ سال بھی ماہرہ خان کے ساتھ 2021 کے خوبصورت چہروں کی فہرست میں نامزد کیا گیا تھا۔